TABUNG KECEMASAN

Sekumbang rega minyak enggau utai bukai udah niki, ngelu pala bejimat ke duit. Tengah bulan start ngeritok lemari, lumpit enggau endur strategik engka bisi tetinggal bekau sesin dua. Mula meresa ba atm engka bisi tetinggal seringgit dua ke enda ingat diketau. Bakanya meh pengidup ba menua ke nama "Malaysia" tu. Terima kasih Malaysia. Bala aki ini lelemai ari bekenang aja ke jeman sida kelia.."suba agi jeman aki makai mi ba kedai cina baru ga 20sin". Apu.. uji diatu bai 20sin ngusung kedai cina, kerupuk chap manuk nya aja meh keulih. Me segera Lee Fah pan ndak lepas, jauh agi enti Maggie. Laban rega duit nyau nadai rega agi, baka jeman ke ngena mata duit daun pisang suba meh. Beguni-guni duit ba dalam tajau nadai dikena. Uji peda ba indon.. nyau beratus ribu rega mi semangkuk, nyau takut ninga.

Diatu kitai semua mesti bisi "emergency saving" tauka tabung kecemasan. Sesin dua nya meh simpan tiap bulan, legi nemu ya nyadi ringgit. Kitai ni nemu engka tak banjir besai, abis tengelam semua mesin atm.. bah bakani ka ngambi duit? Enti bisi nyimpan sesin dua ba lumpit tauka ba dini2 endur ke selamat ulih meh kena meli pemakai semadi nganti ai surut. Enti udah kelalu mayuh simpan lah ba ASB/ASN. Bisi ga bulih anak ya. Tusah enti ka nginjau ngagai bala kaban enti maya suntuk. Kelebih agi maya diatu, semua urang suntuk. Sekali agi meri terima kasih ngagai Malaysia! Tin2 sereta besi2 semua lesap tanggal dicuri urang kena ngulih ke sesin dua. Perengka kena aku bekebun embih udah ditaban ke bala bayat digadai ba kedai "recycle" tambi. Peiii.

Ba dini manah nyimpan? Mayuh bank ulih endur nyimpan. Enti nitih ko aki ini kitai ba ASB nya meh. Laban ke nadai kad ATM lubah mimit ka ngeritok laban ke lembau bebaris ba pejabat pos. Kati baka pemayuh enti nyimpan 100?

• RM75,000 dalam masa 20 taun!
• RM225,000 dalam masa 30 taun!
• RM600,000 dalam masa 40 taun!

(10% faedah setaun-agak2 aja, tau tanya ngagai bank officer)

Kati baka enti nyimpan 300?

• RM250,000 dalam masa 20 taun!
• RM750,000 dalam masa 30 taun!
• RM2,000,000 dalam masa 40 taun! Pehh, 2 juta ringgit!

Nya kitai meda, enti kitai rajin nyimpan duit mayuh meh iya beranak uchu icit ba bank. Enti enda, punas nadai anak meh iya. Sama-sama meh kitai besimpan ke duit kena jemah ila munyi ko jaku bala menteri "berbelanja biar bijak, rajin-rajinlah menabung".. Sekali agi meri besai terima kasih ngagai negara Malaysia sereta menteri-menteri ya! Nya aja jaku aku, mupuk aku, selamat malam... (bala rayat semua betempik jari..)

p/s: utai empa bisi ba belakang dewan, belubah makai.. peruntukan ari YB enda mayuh laban udah kena ya renubit rumah bini lumur 2.