TV

Bejaku pasal tv, tekenang je jeman agi mit suba... tv itam putih... Taun 1988 kira masanya pames enti bisi tv tajapan itam putih. TV kala udah bisi tang kelalu mar, enda ulih dibeli. TV itam putih pan meli ke sikin. Gaga ati meda apai pulai ari pasar mai tv.. "Ye ye aba meli tv!, ye ye aba meli tv! alu nyaring nyawa belagu, ngasuh anakmit sepiak rumah ninga.. ka ngenyeles ke urang... Nyeh Dom, kami bisi tv baruuuu.. muncung mulut bejaku... Enda ngasai ke tancut pesuk ba depan... ba kolar baju nyau celum kena bekau insak..

Udah bisi tv baru alu enda agkat burit duduk.. bakasetak suis dipusing kena nukar cinil tv. Suba agi setail pusing, diatu ngena remote aja. Enti maya makai sigi belauk tv, ari enam/minggu tumu dani.. ka meda Saseme Street.. Tang sebedau nya mesti sabar ngati laut abis semiang... Sigi mayuh amai jerita katun suba, enda alah ingat. Duduk aja, sigi bisi.. memagi setat ari jam 8, enti lemai setat ari jam 4. TV3 bedau bisi, TV1 enggau 2 aja.

Jerita Gaban sapa enda nemu? Anakmit jeman diatu baru enda nemu.. enti baya umur kami suba sigi nemu magang, enda ngira laki indu. Sigi becita2 ka nyadi gaban. Kati munyi lagu gaban? Wakasau wakasau Gaban...

Jerita Oshin, enda tau miss jerita tu.. nyau sampai labuh ai mata. Enda lupa krupuk cekedis ba jari.

Ultraman Taro masa nya.. diatu udah mayuh macam ultraman..

Ngenang ke tv itam putih tu sigi tahan lasak.. betetaun ngena enda meh nemu jai.. Jenama National tu sigi manah. Setail sigi cun masa nya, enti udah badu meda ulih ditambit depan ya.. bisi sliding wood kena nutup skrin..Pei.. stylo!

Udah pelima taun, dia bala sepiak rumah bisi meli tv kala... jejeling ari tingkap, apuuuu sigi cun agi tv kala. Nya ya enggau ati enda puas pulai ke rumah nusi ngagai indai. "Au.. ila meli tang belajar bebendar dulu..." Ninga urang tuai madah munyi nya, nyau muka bup belajar bebendar... Pengujung peresa gaga ati meda result. TV kala dalam tangan ko ati... Jejampat pulai ke rumah ngeso repot kad.. Tucum2 urang tuai meda bebaris A, sigi ujung bulan melayang duit beri agai cina Mulung kena meli TV...

Kasih tudah TV itam putih.. nyau engkah urang ba stor padi meh tudah... Laban ke udah bisi tv kala nyau enda pames agi tudah. Bala sida cit meh meda tv. Enti lebuh pulai ngagai rumah indai aku agi bisi tv tu ba bilik atas. Tv kala nyau enda temu agi.. Agi bisi ga tudah tv itam putih, nyau bepuluh taun udah agi meh bisi. Tv nya meh nyadi ke pengigat jeman agi mit suba, ngasuh aku belajar bebendar... Enti ukai ketegal tv itam putih, nadai meh tetemu ke "A". Terima kasih tv itam putih, tajapan diatu semua urang udah ngena Flat Screen tang nuan tetap dikenang.

Lelengau ke munyi bakasetak leboh ke nukar channel. Pappp! munyi tisi TV dipalu enti gambar turun niki....