Pedis ati bisi, sinu ati pan bisi, ka nyabak pan bisi. Macam-macam meh asai ati lebuh ninga cherita pun taun 2009 tu. Ukai cherita katun kaban, tang cherita amai. Pasal urang ke belaban ngena leka besi.
Enda nemu meh aku nama runding bala sida tu, udu ka belaban ke pangan diri. Enda meh nemu aku sapa ke salah sapa ke betul. Siko madah diri betul, siko legi nunjuk ke jari ngagai siko. Bah enti bakatu, nama kebuah kita belaya deh??? Berebut ke tekang gemala? Tauka berebut ke tanah pesaka aki ini? Uji runding memanah ka, baka kitai ba rumah panjai meh. Baum serumah enti bisi "konflik" sekaban.
Nama kebuah mensia udu ndar ka beperang? Enti jeman kelia, ngayau ko urang. Bala iban ngayau begiga ke pala. Sapa mayuh agi nya meh nyadi raja berani. Ngelaban munsuh ke ngacau pendiau, ngerumpak reta sereta betaban ke anak dara. Nya jerita kitai dulu kelia jeman sida Keling, Bungai Nuing. Diatu taun baru 2009 udai wai. Bisi sekeda agi bedau kelinda 2008 ba dinding bedau agi dibuai, nyau udah bala mensia bebunuh kin kitu.
Enti amai asai ati ta enda ulih ditagang ka beperang, asuh mindah dulu bala anak mit, urang indu, tuai ke enda nemu utai. Bala bujang berani tau nganti munsuh, beperang ngetan ke menua. Kati enda kasih meda bala anak mit kena bum, peluru. Mua abis bedarah begetah, bisi ke parai meh nya. Sinu ati meda anak mit ke enda nemu utai parai baka tu. Kena gigit kerengit mimit udah nyabak sida, lebih agi enti baka bum. Chukup penyinu ati meda utai baka tu.
Tu meh baka ulah mensia ninting ari. Dunia nyau makin nyelai. Nadai bisi agi ati sinu tau ke bebasa ke urang/bansa bukai. Urang tacat, urang tuai, indai urang, apai urang, anak mit ke nadai daya nyadi mangsa ulah sida ke kering belaya pangan diri.. Ta nadai reti ngaga utai baka tu, nadai penguntung. Uji simpan mimit ke ati sinu ba dalam ati diriempu. Asai ke meh pemedis urang bukai. Anang nitih ke ati ke ringat/ransi, urang bukai nyadi mangsa.
Besampi meh kitai semua ngarap ke utai baka tu tau ulih "STOP"! Badu agi ngambi nyawa urang, laban nya ukai pengawa kitai tang pengawa Tuhan.
p/s: Nya kebuah aku enggau nyadi sedadu suba.
The RoundRaun Times ianya blog pasal jerita pekara ke nyadi ba dunia, menua sereta penemu baru pasal I.T enggau utai bukai. Ditulis ulih Ken, anak iban ke berasal ari Samarahan.
3 iti jaku nuan:
Amai sinu meda sida anak mit dayah ke bum, dayah ke peluru. Kasih amai sida nya. Nangka meh sabak sida ngenat ke diri pedis. Amai kasih. Ta naka-naka meh sida ke ngembuan ati jai, ati bingking mai beperang, mai belaban nya. Malas enggi nuan kenergy, nya meh kebuah aku enggai nyadi indu misi suba, enda tan ati meda urang sakit urang pedis kelebih gi anak mit. Luput aku nyabak kini?
Deka nguji pengering diriempu, urang ke enda bedusa tauka enda nemu utai nyadi mangsa... Amat ko nuan nya mama, anak mit ke enda nemu utai kati kitai enda sinu. Bedau nemu bejaku udah ditaban nyawa ulih bum/leka senapang....kasih..
amai nya kaban, nyu baka munuh manuk. ke merinsa amai anak mit ke enda nemu utai agi. tusah mensia kemaya ari tu, enda besukur ngagai pemeri petara
Post a Comment