Jerita Tuai 2

Dinga kenu tak lalu beranti
Ribut kudi ngili ka ai mutong tanjong.
Dinga tak guntam-guntam
Pangka selatan ribut nyabong
Dinga bua tak lalu bepangka
Kenu mulas ka uchong
Angin reraga kenu tak enda jena baka
Nempoh kerapa mubok kampong
Lalu mangka ka rumah orang Panggau Libau.

Tak ngenjing guntam-guntam
Munyi tatam riam bala
Tak ngenjing begugu nempoh kerapa
Mangka ka rumah sida Bunga Nuing
Manok Biring disabong mali lenyang
Rumah sida Patu Buloh Antu lanting tekejang
Mangka ka rumah sida
Sempurai Munti Gerai Lancham Disimbang.

Tak ngenjing merengong
Kenu pangka ribut nyabong
Mangka ka rumah sida Panggau Libau.
Dia kenu rumah panjai sida
Nyau guyat-guyat
Asai ke diau ka rampu randau tengang.

Dia ribut nyau majak balat sabalat
Mangka ka rumah sida Panggau Libau
Ke bengat panjai
Sahari tajai ngindang
Raga tanju abis tekebu magang.
Laban pangka ribut
Makin lama makin balat.
Nya meh Sempurai
Nyau baka ke mabok, bejalai kasetak-kasetak.

Sekeda leka pantun ba ensera "Engkeratong Ayam Raja" ulih Mr. LIONEL FREDERICK MAWAR 1967 .