ANTU BUYU

Ujung minggu tu tadi kaban aku bisi datai ngusung aku ke rumah, mayuh meh randau kami duai. Nanya ke pengerai pangan diri. Keujung2 randau kami duai alu muka randau pasal "Antu buyu". Nyau nyerengat bulu ninga utai baka tu. Ngenang ke leboh maya aku agi mit suba, kira ka umur 7 taun nya meh, bala sida aya aku bisi bemanang/bedukun meh ko laut. Laban aki aku ndang sigi manang, nemu ngubat urang ke sakit kena utai ke enda ditemu lutur meh.


Ko cerita suba, anak bala aya aku tu sigi enda entu berapa pengerai meh. Suah sakit, puas dibai ke spital betemu lutur tang nadai ga bisi sakit ko lutur. Mayuh macam ubat diberi tang enda ga nemu gerai. Kepuas2 udah nguji kin kia dia aki aku alu bisi ngambi mimpi, ko dalam mimpi madah ke sida menyanak kena kacau antu buyu. Apu... nyau temu meh nama utai ke ngachau sida menyanak tu tadi... Udah nemu bakanya dia aki aku merati ke baru ngena, nerebai ke semengat iya kena meda enggau silik agi (kira ke urang ke bisi pengaruh tauka (yang/semengat) ke bisa meh ulih meda/ngaga utai baka tu). Dia ya madah utai tu nyau ka mansau. Baka buah rian nya meh nyau ka lalu mansau. Enti lalu mansau enda nyamai meh agi dempa. Bakanya meh penyakit tu, enti udah lalu mansau ulih mai nyawa meh ya.

Baka ranggap meh mulut kami ke mit ninga urang berandau pasal utai tu. Laban ke enda nemu, betanya meh ngagai urang tuai. Urang tuai sigi enggai ka madah ngagai bala kami laban nemu bala kami tu ndang sigi penakut. Legi enda tinduk.

Nyambung ke jerita kitai tadi, dia aki aku alu madah utai tu mesti ka diadu enggau jampat. Bemanang(belian ko kami sepiak kitu) besai meh kena muru utai tu. Penyampau manang dikena ianya 3 iko laban enda ulih siko, kira ka backup meh 2 iko nya tadi takut ke enda alah siko ngelaban antu nya. Utai perengka ke dikena sigi disedia ke magang meh. Gong, engkerumung, piring2 baka manuk, telu, enggau mayuh agi macam2 penti (kayu ke digaga baka mensia). Bisi siti "ayun" ko jaku kami din tang bisi leka jaku ke khas meh kena nyebut utai tu, enti jaku laut "buian". Utai tu dikena bala manang nerebai ke diri ngagai menua sebayan betemu enggau antu tu. Bala manang tu sigi bebai ke pedang kena sida belaban. Semalam-malam meh bala manang tu belagu nitih ke palu gung, leka jaku sida ngena jaku bahasa tang enda meh nemu leka ke disebut sida ya. Bekangau ke bala semengat nya meh ke ulih nerebai ke sida sereta ngelaban bala antu.

Kepuas semalam-malam bala manang tu belagu ngena leka jaku sida ya, ari pan tawas. Dia bala manang pan berenti, peda ba jari sida bisi begenggam ke utai. Dengkah ba mangkuk putih, peda tak utai nya nyelai endar.. baka taring, bulu buk sereta kain chelum, jarum nyau betegar. Ko bala manang "peda kita jarum tu, nyau betegar, enti patah jarum tu ulih mai nyawa". "Utai ke ngacau bala kita menyanak ianya antu buyu, udah diburu meh, enda ya agi ngacau kita" nya meh munyi padah aki aku. Udah tembu semua utai, bepantang meh sida menyanak, enda ulih keluar rumah 3 ari 3 malam. Bakanya mega urang enda tau tama ke rumah sida tu.

Gerai nyamai meh udah nya bala sida menyanak. Laban utai ke ngacau sida nyau nadai agi... Dia bala selalu bekenang... ngasi mega utai ke dikena aki ngubat bala ke sakit. Amai ko urang, jeman kelia dini bisi lutur, sida meh ke nyadi lutur. Ngubat bala ke sakit jamah utai ke enda dipeda. Tang diatu jeman udah maju, sakit mimit ke spital meh kitai. Tang enti penyaki nya enda ditemu bala lutur, ulih meh nguji chara bukai. Bisi ke arap bisi mega enda. Nitih ke pengarap siku-siku meh. Diatu penyaki mayuh macam, tajapan udah diau ba negeri bisi meh utai ke enda manah selalu ngacau. Enti ukai antu, mensia ke nyadi antu.. Sama2 meh bejaga ke diri empu...